LAOAG CITY – Possible a kiddawen ti kampo ni Acting Senate President Sherwin Gatchalian ti special Senate session ken ni Presidente Ferdinand Marcos Jr., para kadagiti naitantan a legislative agenda gapu iti nagsasaruno a panagsukat ti liderato iti kangatoan a pagpandayan linteg iti kongreso kadagiti naglabas a lawas.
Segun ken ni Gatchalian, iti agdama ket manarimaan ti panangileppas da kadagiti nailungalong a gakat ken dagit appointment no saan a maas-asikaso no aprubaran ti Palasyo ti special session.
Karaman kadagiti matututukan ket ti kumpirmasyon ti sumagmamano nga opisyal ti Armed Forces of the Philippines (AFP), partikular ti lima nga heneral a mabalin a maapektaran ti pannakaitantan ti deliberasyon ti Commission on Appointments (CA).
Inpetteng ti acting Senate President, saan laeng daytoy nga isyu ti administrative delay no di ket aktuwal nga epekto iti operasyon ti gobyerno, kangrunaan na iti biang ti uniformed personnel nga agur-uray ti kumpirmasyon da iti promosyon.
Iti babaen ti maipatpatingpal a sitwasyon, saan pay a naan-anay a nabukel ti Commission on Appointments (CA) ken sumagmamano a Senate committees, kalpasan ti namin-adon a daras a panagbalbaliw ti liderato ti Senado manipod Mayo agingga iti Hunyo.
Kabayatanna, inbatad ti Malacañang a silulukat ni Presidente Marcos Jr. iti kastoy nga addang no adda ti pormal a kiddaw manipod iti Senado ken nalawag a listaan ti urgent agenda.
