LAOAG CITY – Saan a bumaba iti 11 nga indibidual ti natay kalpasan ti rinnupak dagiti pulis ken dagiti sumupsuporta ti mapawilan a grupo iti Pakistan-administered Kashmir.
Dinosdosena pakairamanan dagiti pulis ken sibilian ti nasugatan iti riribok kalpasan a nagdesision ti Korte Suprema ti rehion a ti 12 a puesto iti lehislatura para kadagiti refugee manipud Kashmir nga agnanaed idiay Pakistan ket protektado ti Konstitusion ken saan a mabalin nga ikkaten nga awan ti naamendaran.
Ti desision ket inparuk-at sakbay ti naikeddeng a tignay protesta ita nga aldaw ti Martes ti Joint Awami Action Committee (JAAC), maysa a grupo a nabayagen nga agpanpanawagan ti nalawlawa a karebbengan ti pulitikal ken panangikkat kadagiti puesto para kadagiti refugee.
Naammoan a kadagiti naglabas a tawen, sumagmamano a dadakkel a tignay protesta ti Joint Awami Action Committee ti nagtungpal iti kinaranggas.
Inbatad ni Sardar Waheed Khan, Commissioner ti Poonch sector nga uppat a pulis ken maysa a sibilian ti napatay kalpasan a pinaltu-paltogan dagiti miscreant.
Kas sungbat dagiti otoridad, innem a mangiwaywayat ti pimmusay.
Kuna ni Police Chief Liaqat Malik a 23 a kameng ti seguridad ken 50 ti mangiwaywayat ti tignay protesta ti nasugatan idinto a 30 nga indibidual ti naarestar.
