LAOAG CITY – Nagun-od ti anak ti maysa a mangngalap ken housewife a ni Mr. Aldrei Diric Edu ti Top 2 iti 2026 Physical Therapist Licensure Examination.
Segun kenkuana, naammoanna a nakapasa daytoy babaen ti kabsatna ngem saanna a ninamnama a karaman isuna kadagiti topnotchers iti nasao a board examination.
Inbatadna nga idi immuna ket kalikagumna nga agadal iti Univesity of the Philippines – Manila no sadinno a nangipasa daytoy kadagiti kasapulan a requirements ngem saan daytoy a naakseptar.
Nupay kasta, inlawlawagna a mamati daytoy a matungpalna ti arapaapna nga agbalin a Physical Therapist babaen iti panagadalna iti Mariano Marcos State University.
Kunana a nagbalin a naiget ti panag-review-na ngem saanna nga inpalubos a mapukawan daytoy ti oras iti social life kas iti panagehersisio, umno a pannangan ken umdas a panaginana.
Innayonna nga uppatda nga agkakabsat no sadinno tallo kadakuada ket nakaturposen iti kolehio idinto a ti buridekda ket manarimaan met a mangal-ala iti kurso a Physical Therapy.
Naammoan a ni Edu ket nakagun-od ti 91.55% rating idinto a ti Mariano Marcos State University ket maibilang a number 2 Top Performing Schools iti intero a pagilian.
