LAOAG CITY – Nagdesision ti House Prosecution Panel a saanen nga ipresentar iti witness stand ti mangibagbagi ti Civil Service Commission (CSC) iti agtultuloy nga impeachment trial kontra ken ni Vice President Sara Duterte.
Umunan nga inaprubaran ti impeachment court ti subpoena para ken ni Atty. Ariel Ronquillo, deputy commissioner ti Civil Service Commission.
Nupay kasta, inlawlawag ni Rep. Terry Ridon a dakkel a paset ti manamnama nga testimonia ni Ronquillo ket ti nairamanen iti inaramid a panangpasingked da dati a Sandiganbayan Presiding Justice Amparo Cabutaje-Tang ken Ombudsman Records Division Officer-in-Charge Atty. Karen S. Batu.
Gapu iti daytoy, insigida a naiyakar ti prosecution panel iti panangpresentar ken ni Atty. Gerardo Del Rosario, maysa nga abogado a nagserbi iti babaen ti Securities and Exchange Commission (SEC).
Segun ken ni House private prosecutor Atty. Erwin Matib, ti kangrunaan a papel ni Atty. Del Rosario ket ti mag-authenticate dagiti corporate records ken business interests ti Bise Presidente iti babaen ti Article II ti impeachment complaint.
Usaren ti prosekusion dagiti opisial a dukomento manipud iti Securities and Exchange Commission (SEC) tapno itunos ken beribikaren ti inbatad ti Bise Presidente iti Statement of Assets, Liabilities, and Net Worth-na (SALN) partikular no indeklerar ti net worth-na datoy a ngimmato iti P7.2 milyon idi 2007 nga nagturong iti sumurok-kumurang P98 million idi 2025 ket maitunos kadagiti legihitimo a revenue ken sanikua.
Kabayatanna, manamanama a sumango ti mangibagbagi ti Securities and Exchange Commission (SEC) dagiti damag mainaig iti General Information Sheet (GIS) dagiti adda pakainaiganna ti kompania no sadinno rumrumuar nga agtalinaed nga stockholder ken kameng ti Borad of Directors ni Duterte manipud 2022 agingga 2025 kabayatan a nakatugaw daytoy ti puesto ti gobierno.
Kalikagum a paneknekan ti prosekusion no adda ti panaglabsing iti linteg ti Bise Presidente gapu ta saan a pananagsardeng wenno panag-divest kadagiti negosiona kabayatan nga agseserbi iti gobierno.
