LAOAG CITY – Inbatad ni Hon. Saul Lazo, a chairman ti Committee on Education a mapalawa ti Scholarship Program iti Gobierno Probinsial.
Kunana a manarimaan ti pannakaamendar ti ordinansa tapnu manayonan dagiti kurso a karaman iti Scholarship Program.
Inlawlawagna a dagitoy ket kas koma ti Dentistry, Radiology Tech, Veterenary Medicine, Medical Technologist, Psychology gapu ta nakitada a dagitoy dagiti kasapulan ti probinsia.
Malaksid iti dayta, adda pay ti suhestion a mairaman dagiti kurso nga adda ti pakainaiganna ti culture and arts, no sadinno a maysa kadagiti benepisario ti scholarship program ti probinsia ket ni Mr. Aian Raquel, ti Tourism Officer a napan nagbasa iti ballasiw taaw.
Mainaig iti daytoy, nadutukan met ni Sangguniang Kabataan (SK) President Eldritz Viernes nga agsukisok nu ana dagiti kangrunaan a kurso a kayat dagiti agtutubo, kasta met kenni Hon. Hanson Chua a daytoy ket makikoordinar kadagiti pribado a sektor para kadagiti adado pay nga impormasion mainaig dagiti kasapulan para iti daytoy a gakat.
Kabayatanna, mainayon pay ti Masters Degree ken dagiti mangisursuro iti nasao a gakat gapu ta dagitoy ti kangrunaan a kasapulan.
