LAOAG CITY – Nangipatungpal ti gobierno ti 60 nga aldaw a price freeze wenno temporario a panagsardeng iti panagngato ti presio dagiti kangrunaan a magatgatang kadagiti lugar a naapektaran ti magnitude 7.8 a gingined iti Mindanao.
Gagem ti addang a mapagtalinaed a nalaka ti presio ti taraon ken dadduma pay a kangrunaan a kasapulan kabayatan nga agtultuloy ti relief ken rehabilitation efforts kadagiti naapektaran a komunidad.
Maipalagip a ti napigsa a gingined a timmama nga asideg iti Maasim, Sarangani idi Lunes ket nangitunda ti nalawa a pannakadadael kadagiti nagduduma a paset ti Mindanao.
Kuna ni Trade Secretary Cristina Roque, inaldaw nga agmon-monitor dagiti regional office ti gobierno tapno masigurado nga umdas ti suplay ti taraon ken saan a ngumato ti presio dagiti magatgatang.
