LAOAG CITY – Irekomendar ti Department of Agriculture (DA) ti pannakaiyalud-od ti P50-per-kilo maximum suggested retail price (MSRP) para iti bagas a naikeddeng nga ag-expire wenno agngudo inton Hunio 30.
Inbatad ni Presidential Communications Office (PCO) Undersecretary ken Palace Press Officer Claire Castro nga ad-adalen a naimbag ti Department of Agriculture ti posibilidad nga iyalud-od ti addang tapno pagtalinaeden ti presio ti bagas a nalaka para kadagiti consumers.
Nupay kasta, kuna ni Castro nga awan pay ti naaramid a pinal a desision, ti gakat ket kasapulan a dumalan iti naiget a panangtingiting ti National Price Coordinating Council sakbay pay nga isubmitir iti panangaprobar ti Presidente.
Kabayatanna, kinumpirmaran ni Castro nga adda ti sumagmamano a rice retailers ti dimmalan iti imbestigasion mainaig iti maipagarup a pannakapaay a sumurot wenno saan a panangsurot iti government-imposed price cap.
