LAOAG CITY – Plano ti lokal a gobierno iti siudad ti Batac a pagbalinen a tourist attraction ti Pick and Pay program.
Segun ken ni Mayor Mark Christian Chua, napanunutanda daytoy kalpasan a nakitada a napintas ti resultana ti insayangkatda nga aktibidad idi naselebraran ti panagkasangayna.
Inlawlawagna a daytoy ti kangrunaan nga ideyada nga awan unay ti mausar a pundo ket makaparagsak iti publiko.
Kunana a ti nasao a programa ket nadisenio para kadagiti Overseas Filipino Worker, balikbayan ken senior citizen a kalikagumna a mapadasan ti presko a nateng.
Maragsakan ti Mayor nga adu dagiti nangapresiar iti daytoy rason a kalikagumda nga uliten wenno aramiden a pangawis ti turista.
Innayonna a dagiti gulayan sa barangay ket mabalinda a lukatan dagitoy para iti pick and pay.
