LAOAG CITY – Inpakaammo ni Atty. Charito Malicad, officer in-charged ti Business Permit and Licensing Office (BPLO) ditoy siudad ti Laoag a naikkanen ti permit to operate dagiti dua manipod kadagiti uppat a napaserraan a pasdek gapo iti saan a pannakai-renew ti business permit-da.
Inbatad ni Atty. Malicad a ti dua nga establisiemento nga nagsublin ti operasionna ket ti Laoag-Pagudpud terminal ken maysa a talyer ti nasao a siudad.
Kabayatanna, kunana nga adda pay dagiti dua a nabati a nakaserra ken inpettengna a ti maysa kadagitoy ket addaan ti legal issue ken iso ti manarimaan nga ururayen ti opisinada ti legal a desision iti legal office a pagibasaranda sakbayda nga ikkan ti permit.
Maipalagip a dagitoy ket pinaserraan ti Business Permit and Licensing Office gapu iti saanda a panagsurot kadagiti pagannurotan ti ahensia no sadinno ket pakairamanan dagitoy ti maysa a bus terminal, maysa nga apartment building ken dua a vulcanizing shop.
