LAOAG CITY – Umaboten iti siam nga indibidual ti natay gapu iti leptospirosis idiay Quezon City manipud Enero 1 agingga Hunio 18, 2026 basar iti kaudian a rekord ti Quezon City Epidemiology and Surveillance Division (QCESD).
Basar iti datos ti Quezon City Epidemiology and Surveillance Division, nakairekord metten ti siudad ti pakabuklan nga 66 a kaso ti leptospirosis iti nasao a panawen.
Iti nasao a bilang, 36 wenno 55 a porsiento ket dagiti indibidual nga agtawen ti 31 agpangato.
Inpakita iti report ti siudad nga ad-adu kadagiti lallaki ti tinamaan ti sakit nga umabot iti 55 a kaso wenno 83 a porsiento ti pakabuklan a bilang idinto a 11 a kaso wenno 17 a porsiento ti nairekord kadagiti babbai.
Basar iti Department of Health, karaman ti leptospirosis kadagiti masansan a sakit a ngumatngato ti kaso tunggal panawen ti panagtutudo.
