LAOAG CITY – Nagatangen ti Ilocos Norte Electric Cooperative wenno INEC ti lote a pakaipatakderan ti sub-station iti ili ti Bangui.
Segun ken ni General Manager Perry Martinez iti nasao a kooperatiba, nakapagsaritada ken ni Mayor Denton Garvida maipanggep iti daytoy a banag ken maragsakan gapu ta ad-adda a naiyasideg ti paggapoan ti kuryente a mang-supply ti nasao nga ili pakairamanan dagiti kabangibangda nga ili.
Inbatadna a daytoy ti mangsolbar ti problemada iti ili ti Pagudpud mainaig iti supply ti kuryente.
Inlawlawagna a no adayo ti paggapoan ti supply ket ad-adu met ti mapukaw wenno ti maaw-awagan a systems lost isu a masapul a maiyasideg.
Kunana a dagiti dadduma nga ili nga adda ti pundona ket adda ti sub-station-na tapno maliklikan daytoy.
Maipalagip a ti naudi a nainaguraran a sub-station ket iti ili ti Bacarra ken daytoy ti maika-11 a sub-station ti Ilocos Norte Electric Cooperative.
