LAOAG CITY – Naglikudan ni Barangay Kagawad Karen Respicio ti Barangay 2, Hilario iti ili ti Banna nga agpapautang daytoy kadagiti tattao nga agkasapulan ti kuarta.
Daytoy ti nagbalin a sungbatna kalpasan nga adda ti dimmanon a reklamo ditoy Bombo Radyo Laoag a ti nasao a kagawad ket agpapautang ken umabot ti 20% ti interes ti maipautang.
Segun ken ni Respicio, saan a direkta nga isuna ti paggapoan ti kuarta no diket adda ti am-ammona manipud iti ili ti San Nicolas nga isu ti pangalaanna ti kuarta.
Inbatadna nga adda dagiti tattao a sumagmamano kadagitoy ket kabarangayanna ti mapan agpakpakaasi kenkuana tapno agkiddaw ti kuarta.
Inlawlawagna nga awan ti maipabulodna ngem adda ti am-ammona nga agpapautang ngem nangina ti interesna.
Kunana a gutgutigotenna dagitoy a saanda nga ituloy ti umutang gapu ta nangina ti interes ngem gapu iti pagkasapulan dagitoy ket ituloyda.
Inpettengna nga isakripisiona payen ti agturong iti ili ti San Nicolas tapno laeng matulongan dagitoy.
Rumrummuar a dagitoy nga ut-utangen dagiti sumagmamano nga indibidual ket pagbayadda met laeng iti utangda.
Mamati ni Respicio a ti agrekreklamo ket dagiti tattao a saannan a kayat ti agbayad pay.
Inadmitirna a 20% ti interes ti mautang no sadinno nga iti sangaribu ket aginteres ti 200 a pisos iti tunggal lawas a naglabas a saanda nga agbayad.
Inpakaammona a ti kadakkelan a naipabulod ket lima ribu a pisos ken ti kababaan a naipautang ket maysa ribu a pisos.
Innayonna a maproblemaan isuna gapu ta marigatan nga agsingir ken inpasingkedna nga uray ti principal laengen ti bayadandan.
Kabayatanna, basar iti maysa nga abugado a nakailanad iti linteg a maipawil ti nalabes unay nga interes ti utang a saan a kabaelan a bayadan ti immutang ken maibasar iti trabaho daytoy.
