LAOAG CITY – Immanamong ti Sanguniang Panlalawigan a tulonganda dagiti nagboluntario a quarry operators a mangkutkut ti Padsan River iti siudad ti Laoag a paset ti Gilbert Bridge.
Inbatad ni Sanguniang Panlalawigan Member a ni Atty. Saul Paolo Lazo a sisasaganada a tumulong kadagiti quarry operators tapno maliklikan ti panaglayus no dumteng ti panagtutudo.
Mainaig iti daytoy inpettengna a sakbay iti pannakibuligda kadagiti quarry operators ket masapol nga i-prisintar dagiti quarry operators ti He Sha Prime Sand ken Gravel Aggregates Philippines Inc. ti memorandum of agreement a mangpaneknek ti pammalubos ti gobierno probinsial ti panagkutkutda iti Padsan river.
Kabayatanna, maipalagip nga adda dagiti impormasion a ti laeng He Sha ti naikkan ti pammalubos a panagkutkot iti Padsan River ngem basar iti Department of Environment and Natural Resources ken Department of Public Works and Highways nga adda naiparuk-at nga circular nga awan ti pammalubos ti He Sha iti proyekto.
Iti baet daytoy, pursigido ti gobierno probinsial ti pannakaipatungpal ti nadakamat a proyekto gapo iti maipagarup narabaw’en ti karayan.
Inpetteng ti Provincial Government of Ilocos Norte a namnamaenda a babaen iti pannakakutkut ti Padsan River ket maliklikan ti panaglayus iti siudad ti Laoag nangruna kadagiti lugar nga asideg iti nadakamat a karayan.
