LAOAG CITY – Nagkasar ti maysa a Mayor ken ti nobyana a caiman wenno maysa nga specie ti buwaya iti bassit nga ili iti Mexico.
Ti nadakamat a seremonya ket tapno mangted kinarang-ay iti ilida.
Iti lugar ti San Pedro Huamelula ket nakipagpaset dagiti lokal a residente tapno agsala ken rubuatan ti nadakamat a bride a caiman wenno buwaya nga agnagan ti Cintia Ramirez Ahumada.
Segun iti pammatida, nangrugi daytoy a tanggadda manipud pay laeng idi sakbay a dimmateng dagiti Espanyol kadagiti agtutubo iti bario ti Chontal ken Huave iti estado ti Oaxaca.
Basar iti pammatida, ti caiman ket maysa a dios a mangibagbagi iti Inang Kalikasan ken ti panagkasarna daytoy iti maysa a lider ti maysa nga ili ket panagkaykaysa ti tao ken ti dios.
Nagrambak dagiti lokal a residente idi nagkasar ti caiman ken ti lokal a lider a ni Daniel Gutierrez gapo ta mamatida a mangitunda daytoy ti panagrang-ay ken ken ado nga apit iti lugarda bayat iti panagkaykaysa dagiti dua a nagkasar.
