LAOAG CITY – Maipawilen nga aglako dagiti sari-sari store ditoy siudad ti Laoag kadagiti pharmaceutical products wenno dagiti agas.
Segun ken Dr. Rodrigo Catcatan, mangidadaulo ti City Health Office ditoy siudad, masapul nga adda ti pharmacy ti maysa nga indibidual tapno makalako ti agas.
Inbatadna a mabalin a narisgo para kadagiti gumatgatang ti agas kadagiti sari-sari store isut gapuna a naiget ti panangkita daytoy.
Inlawlawagna a ti mabalin laeng nga ilako dagiti sari-sari store ket dagiti agas a maibilang nga over the counter wenno home remedies.
Kunana a daytoy ti maipatpatungpal a pagannurotan tapno masigurado a saan a mairisgo ti salun-at dagiti umili ditoy siudad ti Laoag.
