LAOAG CITY – Napilaanen ti kaso a panaglabsing ti Republic Act 9165 dagiti tallo nga indibidual a naarestar gapu iti pangisayangkat da ti drag racing iti ili ti Dingras.
Daytoy ti inpakaammo ni Police Major Adrian Agbanaoag, ti acting spokesperson iti Ilocos Norte Police Provincial Office.
Nabigbig dagiti suspek nga agtawen 37 ken 31, construction worker ken agpada a residente ti Barangay Albano iti ili ti Dingras idinto a ti maysa ket agtawen 23, awanan asawa, construction worker ken residente ti Barangay 5-B, Pagsanaan Norte iti ili ti Badoc.
Immuna iti daytoy, nagresponde a dagus ti Philippine National Police iti ili ti Dingras kalpasan a nakaawat da ti report mainaig ti kaadda dagiti aglulumba ti motorsiklo iti by-pass road iti paset ti Barangay Guerrero iti nasao nga ili.
Apaman a nakadanun dagiti otoridad iti lugar ket inarestar da a dagus dagiti tallo a suspek tapno maipaayan da ti citation ticket.
Nupay kasta, kagiddan ti pannakaarestar dagiti suspek ket isu met ti pannakatnag ti maysa a papel a naglaon ti maysa nga heat-sealed transparent plastic sachet nga addaan ti white crystalline substance a maipagarop a shabu, ken iti panangkapkap dagiti otoridad kadagitoy ket nakakumpiskar da pay ti uppat a pedaso ti empty transparent small sachet.
Gapu iti daytoy, malaksid iti panangisyu dagiti otoridad ti citation ticket kadagiti suspek ket pinilaan da pay dagitoy ti kaso a panaglabsing ti Republic Act 9165 wenno Comprehensive Dangerous Drugs Act of 2002.
