LAOAG CITY – Inadmitir ni Department of Justice Secretary Fredderick Vida nga awan pay ti baro a report maipanggep kadagiti sangsangwen a reklamo ni Vice President Sara Duterte iti nasao nga ahensya.
Inbatad na nga agtultuloy paylaeng ti panangtingiting ti Department of Justice ti‘draft resolution’ti reklamo nga ‘inciting to sedition’ ken ‘grave threats’ kontra iti bise presidente.
Maipalagip nga idi Pebrero 2025 ket inpila ti National Bureau of Investigation dagiti nadakamat a reklamo kontra ken ni Vice President Duterte.
Mainaig iti daytoy kadagiti panagpangta ti bise presidente iti biag da Presidente Ferdinand Marcos Jr., first lady Liza Araneta-Marcos ken dati nga Speaker Martin Romualdez.
Iti maysa a press conference nga insayangkat ti bise presidente idi Nobyembro 2024, inbutaktak na a nangala ti mangpatay iti presidente no mapapatay daytoy.
Gapu iti daytoy, iti nakapenpen a reklamo a sedisyon kontra iti bise presidente, inpasigurado ni Justice Secretary Fredderck Vida iti panangipaay da kadagiti impormasyon iti kanito a maaddaan ti baro nga addang maipapan iti daytoy.
Kabayatanna, kuna ni Vida a maisina ti proseso ti Department of Justice iti isaysayangkat nga ‘Impeachment Trial’ ti senado ken ni Vice President Duterte iti baet nga agpada ti‘grounds’.
Inpaganetget ti sekretaryo a ti pokus iti‘Impeachment Process’ ket pagsungbaten ti maysa nga‘impeachable official” no adda ti umdas a pagibasaran, idinto a ti trabaho ti Department of Justice ket tingitingen ti pagsungsungbatan iti kriminal ti maysa nga indibidwal iti babaen ti ‘panel of prosecutors” a pinusgan ti departamento.
Kagiddan iti daytoy, inpasigurado ni Justice Secretary Vida masurot ken matungpal ti mandato ti departamento iti panangiggem da iti nasao a kaso ken isyu.
