LAOAG CITY – Awanen dagiti naruay nga ubbing nga agpalpalama ditoy siudad ti Laoag.
Segun ken ni Mrs. Perlita Cabello, mangidadaulo ti City Social Welfare and Development Office ditoy siudad ti Laoag, daytoy ket gapu iti panangbagbagada pakairamanan dagiti nagannak dagitoy.
Inbatadna a no adda dagiti makitada nga agpalpalama ditoy siudad ket insigida a maala ti nagan ken pagnanaedanda tapno mai-report iti barangay ken makasarita dagiti nagannak dagitoy.
Kunana a saan a linged a daytoy ti maysa kadagiti pagsapulanda iti kuarta ngem masapul a masuroan dagitoy nga ubbing iti napinpintas a wagas iti pagsapulan iti panagbiag.
Kabayatanna, kuna ni Cabello a no problemada iti panagbasada wenno aniaman ket nakasagana ti lokal a gobierno babaen iti City Social Welfare and Development Office a mangidiaya ti tulong kadakuada.
Immuna iti daytoy, naputar iti mendicant ordinance wenno iti Presidential Decree 1563 ditoy siudad ti Laoag no sadinno a babaen iti daytoy ket mamulta dagiti agpalpalama wenno agdawdawat ti kuarta ditoy siudad pakairamanan dagiti mangted.
