LAOAG CITY – Kinontra ti kampo ni Senador Jinggoy Estrada ti plano ti prosecution nga ikkaten ni dati a Department of Public Works and Highways (DPWH) Secretary Manuel Bonoan iti graft charge gapu iti anomalya iti flood control.
Iti naisayangkat a panagdengngeg ti Sandiganbayan Second Division, nagpila ti kampo ni Estrada ti panangkontra sumagmamano nga aldaw sakbay pay ti mosyon ti Office of the Ombudsman nga ikkaten ni Bonoan manipod iti kaso ken amendaran ti kaso.
Basar iti prosecution, agbalin a maysa a cooperative witness laengen ni Bonoan saan laeng a kontra ken ni Estrada no di ket uray dagiti dadduma pay a karaman iti maanomalya a flood control projects nga im-imbestigaren ti Ombudsman.
Immunan a kwinestyunaran ni Presiding Justice Geraldine Econg ti legalidad iti saan a panangiraman ken ni Bonoan kalpasan a nakasoan daytoy.
Iti argumento ti prosecution, ti saan a panangiraman ken ni Bonoan ket naipalaon iti Rule 110, Section 14 ti Rules of Court a palubusan dagiti akusado manipod iti criminal information iti babaen ti formal amendment.
Nupay kasta, inpetteng ni Atty. Laurence Arroyo, ti abogado ni Estrada a ti nailungalong a panagbalbaliw ket baliwan na ti teorya ti prosecution iti kaso.
Nailanad iti orihinal nga impormasyon a nagkunsabo da Estrada ken Bonoan iti panagaramid iti nasao a krimen.
Inkalintegan met ti prosekusyon a ti saan a panangiraman ni Bonoan kas akusado ket saan a makaapektar iti laban ni Estrada a karaman iti kapada a flood control projects, ti maipagarop a budget insertions ken kickback commitments.
Kinumpirmaran met ni Presiding Justice Econg a ti nailungalong para iti pannakaamendar iti impormasyon ket naisumitiren para iti resolusyon.
