LAOAG CITY – Agrekreklamo ti kompania ni Sangguniang Panlalawigan Member Johanson Chua kalpasan a saan a nangabak iti bidding process iti panaggatang ti 80 nga FB Van a behikulo ti City Government a maibunong kadagiti barangay ditoy siudad ti Laoag.
Segun ken ni Vice Mayor Rey Carlos Fariñas, umabot iti 92 milyon a pisos ti budget contract ti naaprobaran no sadinno a dua a bidder ti nakipartisipar iti nasao a proyekto.
Inbatadna a maysa kadagitoy ti nangabak a bimmaba ti 200 ribu a pisos ti presiona a 91,800,000 idinto a ti maysa ket umabot iti 7.2 milyon ti bid-na ngem saanda a linukatan daytoy.
Kabayatanna, inpakaammo ni Konsehal Donald Nicolas a nangipasa ti sungbat ti Bids and Awards Committee ti surat ni Mr. Faustino Tungpalan, Sales Supervisor ti NAMCO North Alliance Corporation maipanggep iti pannakadiskualipikarda kas bidder ti pannakagatang ti 80 a multi-purpose vehicle.
Basar iti Bids and Awards Committee, nadiskualipikar ti NAMCO North Alliance Corporation iti technical eligibility basar iti sumagmamano a grounds kas ti saan a panangideklarar ti nasao a korporasion iti pakabuklan a listaan dagiti owner ken shareholders ti NAMCO kas nakailanad iti Section 81 ti Republic Act No. 12009 ken dadduma pay.
