LAOAG CITY –Naawaten ti Sanguniang Panlungsod ditoy siudad ti Laoag ti sungbat ti Philippine National Police Regional Office Region 1 mainaig iti panagkiddawda iti kanayunan a PNP personnel iti siudad ti Laoag.
Segun ken ni Sanguniang Panlungsod presiding officer Vice Mayor Rey Carlos Fariñas a nakaipalaon iti surat ti panagkiddaw iti Philippine National Police a manayunan ti bilang dagiti Police personnel ditoy siudad ti Laoag babaen ken ni Brigadier General Jovencio Badua Jr.
Inabatad ni Philippine National Police Region 1 Brigadier General Jovencio Badua Jr. nga addaanda ti baro a walo a personnel a nai-deploy iti Philippine National Police ditoy siudad ti Laoag ken impanamnamana a kalpasan ti panagturpos dagiti 326 a patrolman iti rehion 1 ket manamnamanto a maiwaras dagitoy kadagiti nagduduma a probinsia pakairamanan ti Ilocos Norte Police Provincial Office ken ti Philippine National Police ditoy siudad ti Laoag.
Innayon ti Bise Mayor a malaksid iti panagsurat ti Sanguniang Panlungsod ket impakaammona nga adda pay ti impatulod a surat ni Congressman Sandro Marcos iti Philippine National Police Region 1 para iti nasao a panagkiddaw.
Maipalagip nga idi laeng kallabes ket adda ti pannakaobserbar ni Sanguniang Panlungsod member Jason Perera a panagkurang ti Philippine National Police personnel no sadinno ket ti pannakaobserbar ti Sanguniang Panlungsod member ket inadmitir met ni Police Lt.Col. Ryan Retotar no sadinno ket daytoy ti agbalbalin a rason no apay a kasapolan ti City Government nga agkiddaw ti tulong kadagiti opisial ti Barangay nga agbantay kadagiti nagduduma a pagadalan ditoy siudad ti Laoag gapu ta saan a kabaelan dagiti PNP personnel iti daytoy a banag
