LAOAG CITY – Nagbalin a naurnus ti pannagna ti impeachment trial ni Vice President Sara Duterte iti umuna nga innem nga aldaw.
Segun ken ni Senate President Sherwin Gatchalian, dakkel ti naitulong ti dua a panel tapno mapagtalinaed ti naurnus a pannagna ti trial, iti baet dagiti serye ti courtroom debate iti nagbaetan ti dua a team.
Dakkel met ti naitulong dagiti serye ti panagsagsagana ti senado ken ti kooperasyon dagiti senador, aktibo a presensiya ti Senate Sergeant-at-Arms, ken dadduma pay a bisita.
Inlawlawag ti Senate President nga adda ti aspeto ti peace and order ti impeachment trial gapu ta maysa a nangato a political figure ti maus-usig isut gapuna a prayoridad ti senado ti seguridad ken ti kinaurnus ti panangusig.
Kabayatanna, kuna ni Gatchalian nga agbalin nga exciting ti trial intono Lunes, Hulyo 20 gapu ta namnamaen ti isasango ni National Bureau of Investigation (NBI) Director Melvin Matibag idinto nga iparuk-at metten ti impeachment court ti desisyon iti kidkiddawen a subpoena ti House prosecution panel.
Segun ken ni Gatchalian, ti kidkiddawen wenno naipasubpoena a dokumento ket ti maibilang a kapatgan nga aspeto ti reklamo.
Iti babaen dagiti nasao a dokumento ket makita ti korte ti pakabuklan ti financial issue a maibatbato kontra iti bise presidente ti pagilian.
