LAOAG CITY – Nagballaag ti World Health Organization nga al-alisto nga agwaras ti Ebola virus idiay Democratic Republic of Congo (DR Congo) maidasig iti immunan nga outbreak iti makapatay a sakit.
Segun ken ni World Health Organization Director-General Tedros Adhanom Ghebreyesus, umabot iti sumurok 2,000 a kaso ti Ebola ti nairekord iti pagilian pakairamanan ti 796 a natay, dua a bulan kalpasan a naideklarar ti outbreak.
Gapu iti daytoy, maikonsiderar ita iti nasao a bilang a maikatlo a kakaroan ti Ebola outbreak a nairekord iti pakasaritaan.
Inbatad ni Tedros a napaspaspas ti panagwaras ti agdama nga outbreak no idasig iti nakaro nga Ebola outbreak idiay Congo idi 2018 agingga 2020 nga umabot iti sumurok 10 a bulan sakbay a nakairekord iti 2,000 a kumpirmado a kaso.
Maipalagip a nairekord ti maika-17 nga Ebola outbreak iti Democratic Republic of Congo idi Mayo 15 kalpasan ti sumagmamano a natay iti probinsia iti Ituri, maysa a lugar iti amianan a daya iti pagilian nga agtultuloy a makapaspasar ti riribok gapu kadagiti armado a grupo.
