LAOAG CITY – Mabalin a makissayan ti tiyansa ti panagsikog ti panagsigarilyo kabayatan a mabalin met a mangitunda ti risgo para kadagiti babbai ken lallaki ti second-hand smoke.
Iti maysa a baro nga ‘knowledge summary’, inbatad ti World Health Organization a ti panagusar ti tabako ket maikonkonektar iti kaawan ti abilidad nga aganak dagiti babbai ken adda ti dakes nga epekto na iti semilya ken sexual function dagiti lallaki.
Maibasar iti panagadal a naiyuswat iti 2000 agingga iti 2026, naduktalan a dagiti babbai nga agdama nga agsigsigarilyo ket adda ti 40 porsiento a nangatngato ti risgo na ti infertility no ikumpara kadagiti saan nga agsigsigarilyo.
Naamoan a dagiti met nagsardengen iti panagsigarilyo ket mabalin nga addaan ti 25 a porsiento a nababbaba iti risgo no ikompara kadagiti agtultuloy ti panagsigarilyo na.
Inlawlawag ti World Health Organization a mabalin a makissayan ti panagsigarilyo ti bisa ti assisted reproduction, karaman ti in vitro fertilization, no sadinno nga ipakpakita kadagiti panagadal a mabalin a bumaba iti agarop kagudua ti tiyansa ti panagballigi.
Basar iti UN health agency, iti intero a lubong, maysa iti kada innem a tao nga adda iti reproductive age ti makapaspasar ti infertility iti maysa a punto iti biagda.
