LAOAG CITY – Nakaawat ti Pilipinas ti USD6.78 milyon wenno sumurok-kumurang P390 milyon) a grant manipud iti Green Climate Fund (GCF) tapno papigsaen dagiti programa iti climate investment a mangprotehir kadagiti komunidad kontra iti epekto ti climate change, mangpaalisto iti panagusar ti nadalus nga enerhia ken mangilungalong ti inklusibo a panagdur-as ti ekonomia.
Basar iti Department of Finance (DOF), ti Third Readiness and Preparatory Support Program (RPSP 3) ti rason no apay a nagbalin nga umuna a pagilian iti Asia-Pacific ti Pilipinas a nakaala ti Green Climate Fund readiness support iti babaen ti maikadua a replenishment period ti pundo para iti 2024 agingga 2027.
Ti grant ket saan a kasapulan a bayadan ken agserbi kas suporta iti panangipatungpal dagiti climate projects a maiyataday iti National Adaptation Plan ken Nationally Determined Contribution Implementation Plan.
Maipalagip nga inaprobaran ti 60 a bulan a programa a gagem a papigsaen ti koordinasion dagiti ahensia ti gobierno, mangbukel ti ad-adu a climate projects ken pasayaaten ti monitoring ken knowledge management systems.
