LAOAG CITY – Dinayyeg ti magnitude 7.4 a gingined ti kabaybayan iti estado ti Chiapas idiay Mexico.
Gapu iti daytoy, nangiparuk-at ti tsunami warning dagiti otoridad ken narikna ti panagdayyeg iti Guatemala ken El Salvador.
Basar iti United States Geological Survey (USGS), timmama ti gingined nga asideg iti Puerto Madero nga adda ti kauneg a sumurok-kumurang 10 a kilometro.
Kagiddan ti panagdayyeg, nangiparuk-at ti United States Tsunami Warning System ti pakdaar a posible a maaddaan ti tsunami waves kadagiti kabaybayan nga adda iti uneg ti 300 a kilometro manipud iti epicenter ti gingined.
Iti Guatemala City, naipadamag a napigsa a narikna ti gingined a nangitunda ti panagal-alisto ti sumagmamano a residente a rummuar kadagiti pagtaenganda.
Basar iti report, nangiwayat ti evacuation dagiti empleado iti maysa a pasdek ti gobierno kas paset ti ipatpatungpal a safety protocols.
Narikna pay ti panagdayyeg iti El Salvador nga apagapaman a napigsa iti kabisera ti estadoda ngem awan ti nairekord a natay wenno nakaro a pannakadadael.
Agtultuloy nga imon-monitor dagiti otoridad ti situasion kabayatan a maiwaywayat ti assessment kadagiti posible nga epekto ti gingined.
