LAOAG CITY – Kinarit ti Malacañang ni Senador Alan Peter Cayetano nga iparuk-at ti liquidation ti binilyon a pisos a pundo nga inusar iti 2019 Southeast Asian Games kagiddan ti panangkwestionar daytoy iti imbestigasion ti National Bureau of Investigation (NBI).
Inbatad ni Palace Press Officer Claire Castro a no awan met ti rumbeng a pagbutngan ni Cayetano iti isyu ti korapsion, nasken a saan daytoy a makapungtot iti maiwaywayat nga imbestigasion.
Kwinestionaran met ni Castro ti Senador no na-liquidate ti binilyon a pundo nga inlatang iti Philippine Southeast Asian Games Organizing Committee (PHISGOC) ken no nai-report ti amin a donasion a naawat para iti nasao a torneo.
Binanatan pay ni Castro ti panangawag ni Cayetano ken ni National Bureau of Investigation Director Melvin Matibag a maysa a “minion.”
Innayonna nga imbes a mangperdi ken agitudo ti dadduma, nasken a sungbatan ti Senador dagiti isyu a maibatbato kontra iti panagusar ti pundo iti SEA Games.
