LAOAG CITY – Inpasigurado ti Land Transportation Franchising and Regulatory Board (LTFRB) a tingitingenda ti amin a pending a petision para iti panangnayon ti plete kagiddan ti agtultuloy a panagngato ti presio ti petrolyo a nakaapektar iti panagngato ti magatang.
Segun ken ni Land Transportation Franchising and Regulatory Board (LTFRB) Chairman Vigor Mendoza II, karaman a tingitingenda ket ti petision ti transport group a Manibela a nangiwayat ti dua nga aldaw a tignay protesta ken ti kiddaw ti Piston a maysa pay a transport group a nayonan ti P10 a plete.
Tinalantan iti taripnong dagiti addang ti gobierno tapno matulongan dagiti driver ken operator pakairamanan ti agtultuloy a P10 iti kada litro a fuel discount program para kadagiti jeepney ken UV Express iti pakabuklan ti pagilian.
Basar iti maudi a datos ti ahensia, adda ti 87,000 Public Utility Vehicles units ti nabenepisiaran ti programa idinto a sumurok 140,000 nga units ti nairekord.
Iti babaen ti programa, maipaayan ti tunggal kualipikado nga unit ti P10 discount iti tunggal litro ti gasolina wenno diesel agingga ti maximum nga 150 litro ti kada lawas.
Inbatad ni Mendoza nga ad-adalen ti Land Transportation Franchising and Regulatory Board (LTFRB) ti panangpalawa ti fuel discount tapno ad-adu pay a public utility vehicle ti mabenepisiaran.
Kabayatanna, inlawlawag ti opisial a saan a nalaka ti panangdesision ti nayon a plete gapu ta adu ti addang a kasapulan nga ikonsiderar pakairamanan ti epektona daytoy kadagiti pasahero ken iti presio ti kangrunaan a magatgatang ken serbisio.
Mainaig iti daytoy, inpasiguradona nga imbes a temporario a nayon ti plete laeng gapu iti panagngato ti presio ti langis, mangiparuk-at lattan ti Land Transportation Franchising and Regulatory Board (LTFRB) ti pinal a resolusion iti kabiitan a panawen.
