LAOAG CITY – Nangipatungpal ni Department of Education Secretary Sonny Angara ti panag-recruit iti intero a pagilian ti 10 ribo a posisyon ti School Counselor Associate I (SCA I) tapno masolusyunan ti nabayagen a kinakurang dagiti mental health services para kadagiti agad-adal.
Daytoy ket paset ti implementasyon ti Republic Act (RA) No. 12080, wenno ti Basic Education Mental Health and Well-being Promotion Act.
Nabilin dagiti Schools Division Offices (SDOs) a nakaawat ti Notice of Organization, Staffing, and Classification Action (NOSCA) a masapol a rugyan da a dagus ti mangpunno kadagiti entry-level positions.
Tapno ad-adda a mapaalisto ti panagrecruit iti intero a pagilian, inmandar ti Department of Education iti amin nga Schools Division Offices nga isayangkat ti sibubukel a proseso babaen ti Agile Gateway for Appointments and Placements (AGAP) System, ti digital recruitment platform ti nasao a departamento.
Inlawlawag ni Angara a saan laeng a maipapan iti panangpunno kadagiti plantilla positions no di ket napateg ti panagala kadagiti School Counselor Associates gapu ta isuda ti agbalin a katulungan dagiti agad-adal iti inaldaw a mental health ken psychosocial needs da.
Inpakaammo na a dagiti School Counselor Associates ket mangipaay ti basic mental health services, learner support, documentation, referral, ken dadduma pay.
