LAOAG CITY – Inbatad ni Vice Mayor Rey Carlos Fariñas a naitantan dagiti gakat a rumbeng a maipila ken matingiting ti konseho.
Daytoy ket kalpasan nga awan ti naiwayat a quorum iti Sanguniang Panglungsod ita nga aldaw.
Segun ken ni Fariñas, innem a kameng ti konseho ti kasapulan tapno maadaan ti quorum ngem uppat laeng dagiti nagatendar a pakairamanan ni Konsehal Conrado Respicio, Konsehal Jayson Perera, Konsehal Jeff Fariñas ken Konsehal Michael Fariñas.
Inpettengna nga idi laeng napalabas a lawas ket nakisaritada kadagiti kameng ti Konseho no makaatendarda nga iso ti gapuna ti panag-commit ni ABC President Rbee Ablan ken Sanguniang Kabataan Federation President Rionell Respicio nga agatendar.
No pay kasta, Segun iti Bise Mayor nga adda iti kellaat a nagbalin a problema dagiti saan a nakaatendar idiay Maynila a nagbalin a rason a saanda a nakaawid a dagos para iti panagatendarda iti nasao am session.
Kabayatanna, nakailanad iti Local Government Code a linawas a rumbeng nga adda maiwayat a session iti siudad ngem gapu iti kinakurang dagiti nagatendar ket naitantan dagiti uppat a gakat manipud iti opisina ti Mayor, Second reading ti 20 a tricycle franchise, 3rd reading, dagiti review and consideration ken dagiti committee reports.
