LAOAG CITY – Naiget a naglikudan ni Senate Minority Leader Alan Peter Cayetano a nagkiddaw daytoy ti “ceasefire” ken ni Sen. Panfilo “Ping” Lacson mainaig iti panagbinnarada iti isyu dagiti maipagarup a “ghost projects” idiay Taguig City.
Ti rakurak ni Cayetano ket sungbat iti nagbalin a social media post ni Lacson a nangibaga nga adda ti maysa a Senador a maipagarup nga agar-arasaas nga agkidkiddaw ti panagsardeng ti panagbinnara nupay awan ti dinakamatna a nagan.
Inbatad ni Cayetano nga adda ti sumagmamano a Senador ti nangipeksa ti panagdanag a ti panagsinnungbatda ti akusasion ket mabalin a makadadael iti imahe ti Senado, maiyaw-awan ti atension kadagiti napatpateg a banag ken makaapektar iti interes ti publiko.
Inpettengna a nasaysayaat nga ikkan ti importansiana dagiti isyu kas ti nangato a presio ti kuryente ken langis, online gaming ken vape ngem iti personal a panagbinnara.
Kuna pay ni Cayetano a nakasagana daytoy a sangoen ti aniaman nga alegasion nga ibatbato kontra kenkuana.
