LAOAG CITY – Karbengan ni Atty. Mans Carpio a mangipila ti legal a tignay no kalikagumna a kwestionaren ti panangiparuk-at ti tax records iti impeachment court.
Rakurak daytoy ti Palasyo kalpasan nga inbatad ni Carpio nga adda dagiti legal nga isyu a nasken a denggen nga umuna ti korte mainaig iti otorisasion nga inpaay ni Presidente Ferdinand Marcos Jr. iti Bureau of Internal Revenue (BIR) tapno isubmitir ti tax records ni Vice President Sara Duterte.
Kuna ni Palace Press Officer Undersecretary Claire Castro a sumursurot laeng ti Presidente iti proseso ken maipatpatungpal a linteg tapno mairuar ti kinapudno.
Inpettengna a no awan ti ilemlemmeng ken awan ti Makita nga iregularidad kadagiti rekord ket awan ti nasken a pagdanagan iti panangtingiting kadagitoy.
Innayon ni Castro a maipannakkel pay ni Carpio ken Vice President Sara a dagiti napastrekda ket aggapu iti nadalus a wagas.
