LAOAG CITY – Napunnon ti National Kidney and Transplant Institute (NKTI) iti Quezon City idi kalman, Agosto 24, gapu iti panag-adu dagiti kaso ti leptospirosis.
Gapu iti daytoy, temporario a limitaren ti panagawat ti walk-in patients iti ospital agingga ti pannakiparuk-at ti kabaroan a notice.
Basar iti issued advisory-da, nangitunda ti nadakamat nga addang ti nangato a bilang dagiti pasiente nga naikabil iti emergency room.
Mainaig iti daytoy, dagiti pasiente a saan nga agkasapulan ti emergency admission ket binalakadan nga makisarita kadagiti attending physicians ken no mabalin ket agturong umuna iti sabali a healthcare facilities nga adda available beds tapno maliklikan ti nabayag a panaguray.
Kabayatanna, dimmawat ti pammakawan ti National Kidney and Transplant Institute (NKTI) iti aniaman a pannakasinga.
Naamoan a saan nangipaay ti ospital ti eksakto a bilang ti pasiente a natamaan ti leptospirosis ngem kabaealan a maka-accommodate ti Emergency Room aginnga ti 64 a pasiente.
Nupay kasta, binalakadan ti Department of Health (DOH) iti publiko a protehiran ti bukod a bagbagi iti nadakamat sakit iti babaen ti panagsuot ti botas no saan a maliklikan ti magna iti layus, insigida a panagbuggo ti saka ti nadalus a danom ken sabon ken liklikan ti pannaka-expose ti layus no adda man sugat.
Innayonda pay nga agpakonsultar umuna iti doktor sakbay nga uminom ti agas para iti leptospirosis.
