LAOAG CITY – Ngimmato manen ti interest rate ti Bangko Sentral ng Pilipinas wenno BSP kas sungbat iti agtultuloy a nangato nga inflation ken dagiti risgo a mabalin a mangitunda iti panagngato iti presio dagiti magatang.
Inpangato ti Monetary Board ti 25 basis points ti key policy rate iti 5%, ti maikatlo a daras a monetary tightening ita a tawen. Kabayatan nga ingngato iti 4.5% ti overnight facility ken 5.5 % ti overnight lending facility.
Nupay nagkapuy ti headline inflation iti 6.2% idi Hulio manipud 6.4% idi Hunio, nagtalinaed daytoy a labes ti 2% agingga 4% a target range ti gobierno.
Basar iti Philippine Statistics Authority nga addan iti 4% ti core inflation.
Inbatad ni Bangko Sentral ng Pilipinas (BSP) Governor Eli Remolona Jr. nga inaramid ti rate hike kas “pre-emptive move” gapu ta agtalinaed dagiti risgo iti inflation pakairamanan ti pabaliw-baliw a presio ti langis, posible a nakaro nga epekto ti El Niño a mabalin a mangipangato ti presio ti taraon ken kanayonan a wage adjustments.
Kabayatanna, inpababa ti Bangko Sentral ng Pilipinas (BSP) ti inflation forecast-na para iti 2026 iti 6.1% manipud iti 6.4% gapu iti lower-than-expected inflation idi Hunio ken Hulio ken ti panagkapuy ti presio ti langis.
Nupay kasta, ingngato ti inflation forecast para iti 2027 iti 5.4% manipud iti 4.5% gapu iti manamnama nga epekto ti El Niño iti presio ti bagas ken posible a panagngato ti minimum wage. Para iti 2028, manamnama nga agsubli iti 3.3% ti inflation.
Mangnamnama ni Remolona a saan a kasapulanen ti baro a rate hike ngem nakasagana ti Monetary Board nga agaramid ti kanayonan nga addang agingga nga adda umdas a kumpiansa nga agsubli ti inflation nga agturong iti 3% midpoint target.
Kabayatanna, ti nangatngato a policy rate ket us-usaren ti Bangko Sentral ng Pilipinas (BSP) tapno malappeddan ti alisto a panagngato ti presio iti babaen ti panagpangato iti borrowing costs ken panangpakapuy iti demand iti ekonomia.
