LAOAG CITY – Nangrugi ti maika-20 nga aldaw ti impeachment trial kontra ken ni Vice President Sara Duterte babaen ti maysa a kararag nga indauloan ni Senator-judge Juan Miguel “Migz” Zubiri.
Iti kararagna, kiniddaw ni Zubiri a saan koma nga agbalin a rason ti panagusig a pagrugian ti saan a panangkikinnaawatan dagiti Pilipino no diketdi agserbi daytoy kas pagrugian ti panagkaykaysa para iti transparent a panangidaulo ti pagilian.
Mainaig iti daytoy, 15 a senator-judges ti nakaatendar iti panagrugi ti panangdengngeg ita nga aldaw.
Iti baet daytoy, impasango ti House prosecution panel iti Impeachment Court ti baro a testigo a ni Col. Manaros Boransing II ken ti panangiprisintar ni Atty. Rey Robles ti offer of evidence iti partido ti prosekusion mainaig iti opisial a rakurak ni Boransing.
