LAOAG CITY – Naarestar dagiti lima a indibidual gapu iti panagsusugalda iti Brgy. Maglaoi Norte iti ili ti Currimao.
Basar iti Currimao Municipal Police Station, bayat ti panag-mobile patrol dagiti PNP personnel iti lugar ket nakitada ti maysa a grupo ti indibidwal a naguummong a maipagarup nga agsusugal.
Gapu iti daytoy, insigida a nagtignay dagiti otoridad no sadinno ket ditoy a naaktuaranda dagiti suspek nga agay-ayam ti Pusoy.
Mainaig iti daytoy, naarestar dagiti suspek a nabigbig a maysa nga agtawen 50, lalaki, awanan asawa, constructon worker; maysa a babai, agtawen 47, naasawaan; maysa nga agtawen 57, lalaki, naasawaan, maysa a construction worker; agtawen 44, babai, balu; ken maysa nga agtawen 61, lalaki, naasawaan ken agpapada dagitoy a residente ti Brgy. Maglaoi iti ili ti Currimao.
Nakunpiskar manipud kadagiti suspek ti kuarta a nausar kas taya nga agdagup ti Four Hundred Forty-Six (446) pesos, maysa a blue set playing cards, pito a pidaso ti plastic a tugaw ken maysa a lamisaan.
Kabayatanna, dagiti suspek ket immuna a naipan iti Municipal Health Office (MHO) iti ili ti Currimao para iti physical examination ken kalpasan iti daytoy, naikabil dagitoy iti Currimao Municipal Police Station para iti naan-anay nga imbestigasion.
