LAOAG CITY – Simmuko ken simmango iti opisina ti Atienza Interisland Ferries Inc. iti Palawan ti kapitan ti nauram a barko a MV June Aster a ni Roel Sarmiento idi Lunes, Setiembre 14, basar iti Philippine Coast Guard (PCG).
Segun ken ni Philippine Coast Guard Spokesperson Commodore Noemi Cayabyab a naikeddeng a dawatan ti statement ni Sarmiento mainaig iti ayanna ken kadagiti nagbalin a pasamak sakbay daytoy a simmango kadagiti otoridad, lima nga aldaw kalpasan ti trahedia iti kabaybayan.
Basar iti kabaroan a datos dagiti otoridad, adda 44 ti bilang ti survivors a nairekord pakairamanan ti kapitan, kabayatan nga 76 a bangkay ti narekobre manipud iti insidente ken 12 nga indibidual ti agtultuloy a birbiroken.
Rimuar iti ticket manifest nga adda 134 ti nairekord a pasahero ngem dua kadagitoy ti nakumpirmaran a saan a naglugan isu a rumrumuar nga 132 ti opisial ken aktual a bilang dagiti indibidual nga adda iti uneg ti barko idi napasamak ti uram.
