LAOAG CITY – Dinungpar ti China Coast Guard (CCG) ti barko ti Bureau of Fisheries and Aquatic Resources (BFAR) a BRP Datu Magat Salamat ita a Biernes, Setiembre 18 iti kabaybayan ti Palawan bayat ti panangitulodda ti krudo kadagiti mangngalap a Pilipino idiay West Philippine Sea.
Segun iti Philippine Coast Guard (PCG), nangitunda ti pannakadadael iti starboard side wenno kannawan a paset ti barko ti BFAR ti nasao a panangdungpar.
Gapu iti insidente, naikkat dagiti railings, metal support, deck fixture ken dadduma pay a ramit ti nasao a barko.
Napasamak ti panangdungpar ti China Coast Guard iti barko ti Pilipnas maysa nga aldaw kalpasan ti balligi a pannakaitapaw ti BRP Datu Magat Salamat manipud iti pannakaisadsadna iti Hasa-Hasa Shoal.
Maipalagip a nangiwaat ti BRP Datu Magat Salamat ti probision ti fuel subsidy mission ti gobierno babaen ti proyekto a KBBM para kadagiti lokal a mangngalap kalpasan ti nagsaruno nga insidente.
Gapu iti daytoy, agtultuloy ti panagbantay dagiti otoridad mainaig iti kasasaad dagiti nakasakay iti barko bayat ti pananakitaripnongda kadagiti nagduduma nga ahensiya para iti sumaruno a panagtignayda kalpasan ti insidente.
