LAOAG CITY – Naarestar iti maysa a lalaki gapu iti panangbagkongna iti lolana kalpasan a saan a napagustuan a naikkan ti kuarta iti ili ti Bacarra.
Ti suspek ket agtawen ti 23, awanan trabaho, kabayatan a ti baket a biktima ket agtawen ti 89, balu, maysa a businesswoman ken agpadada a residente iti nadakamat nga ili.
Basar ken ni PMaj. Adrian Agbanaoag, Chief of Police ti Philippine National Police – Bacarra, ti biktima ket adda iti kasilya iti second floor iti pagtaenganda ket ditoyen a dinanon ti suspek ken nagkiddaw ti kuarta kenkuana.
Kalpasanna daytoy, binagkong ti suspek ti biktima ti namin-adu a daras sakbay a nagturong iti kuarto ti biktima iti ground floor ti pagtaenganda tapno agbirok ti kuarta.
Nagturong met ti biktima iti kuartona no sadinno a nakakitaan ti kabsatna ken nakaawag ti tulong, kabayatan a nakalibas ti suspek a bimmalassiw iti rooftop.
Mainaig iti daytoy, nakapasar iti sugat ti biktima iti paset ti tengnged, ulo, ken mugingna.
Insigida a naitaray ti biktima iti Gov. Roque Ablan Sr. Memorial Hospital ditoy suidad ti Laoag sakbay a naiyakar iti Mariano Marcos Memorial Hospital and Medical Center, iti suidad ti Batac para iti pannakatamingna.
Iti crime scene, narekobre ti maysa a 22cm breadknife nga inusar ti suspek.
Naamoan a ti suspek ket saan a nakainom ken agdama nga adda daytoyen iti kustodiar ti Philippine National Police – Bacarra.
Kabayatanna, manairamaan ti pannakaisayangkat ti Bacarra Municipal Police Station ti naun-uneg nga imbestigasion iti kaso.
