LAOAG CITY –Inbatad ni Atty. Juanito Antonio, maysa a private practitioner, a saan a ‘fixed’ ti pakabuklan a 24 a butos iti impeachment court gapu ta mabalin pay a makissayan daytoy no adda dagiti senator-judge a saan a makapagpaset gapu ta ‘incapacitated’ dagitoy wenno saanda a kabaelan ti agatendar iti panangusig.
Impettengna a dakkel ti posibilidadna nga agresulta daytoy iti pagbalbaliw ti bilang iti pagibasaran ti butos no sadinno a mabalin a makaapektar iti interpretasion ti kasapulan a desision iti panangusig.
Mainaig iti daytoy, kunana pay a dagiti insidente kas ti panag-walkout ti sumagmamano a senador ket saan a makatulong iti imahe ti proseso ken mabalin a mangipakita ti kinaawan respeto iti institusion.
Kinunana nga imbes a mangipaay ti panangilawlawag daytoy ket mangitunda laeng ti panagdudua iti direksion ti panangusig.
Nupay kasta, mangnamnama ni Antonio nga agpannuray ti naurnos a proseso ken posible pay a sumrek laeng ti Korte Suprema iti panangusig no adda ti judicial controversy wenno grave abuse of discretion tapno masigurado nga agbalin a patas ti impeachment proceedings.
