LAOAG CITY – Nagpanawagan ti Department of Education (DepEd) ti ad-adda a naiget a panagbantay iti panagusar ti social media dagiti agtutubo kalpasan ti insidente ti pammaltog iti Banga National High School iti South Cotabato.
Segun ken ni Education Secretary Sonny Angara, maragsakan daytoy iti alisto a tignay ti Department of Information and Communications Technology (DICT) kontra kadagiti online platform a posible a maus-usar iti panang-recruit ken panangimpluwensia kadagiti menor-de-edad nga agaramid ti kinaranggas.
Mainaig iti daytoy, immanamong ti Reddit ken Discord a mangipasdek ti opisina iti pagilian kalpasan ti naipaay a 24 nga oras a deadline ti Cybercrime Investigation and Coordinating Center (CICC).
Gagemna daytoy a mapaalisto ti koordinasion dagiti online platform ken dagiti otoridad iti panagsungbat iti cybercrime ken dadduma pay a pangta iti internet.
Inpaganetget ni Angara ti napateg a papel dagiti nagannak iti panagbantay iti online activities dagiti annak tapno maliklikan a maimpluwensiaan dagitoy dagiti grupo a mangal-allukoy ti kinaranngas.
Dinakamatna pay ti sumagmamano a pagilian a pinaiget ti panagusar ti social media dagiti ubbing nga agtawen 15 wenno 16 agpababa.
Inpetteng ti sekretario a rumbeng a siguradoen ti kinatalged saan laeng iti uneg ti pagadalan no diket kadagiti digital platform pay.
Maipalagip a sumagmamano nga insidente ti kinaranggas kadagiti pagadalan ti nairekord ita a tawen no sadinno sumagmamano kadagitoy ket adda koneksionna iti panagusar ti internet.
