LAOAG CITY – Inyuswat ti Department of Labor and Employment wenno DOLE ita nga aldaw ti Sabado, Setiembre 26, ti ‘Skill Pass’ no sadinno nga addaan ti gundaway a makagu-od ti sertipikasion dagiti benepisiario ti Tulong Panghanapbuhay sa Ating Disadvantaged Workers wenno TUPAD Program.
Iti babaen iti daytoy, mairekord ti kapadasan, panagsanay ken dagiti kabaelan a nagun-od dagiti benepisiario kabayatan ti panagtrabaho iti babaen ti nadakamat a programa.
Mainaig iti daytoy, makikoordinar ti Department of Labor and Employment (DOLE) iti Technical Education and Skills Development Authority wenno TESDA, dagiti lokal a gobierno ken employer tapno maipaayan dagiti kualipikado a benipisiario ti kanayonan a panagsanay ken sertipikasion.
Gagemna daytoy a maipaayan dagiti benepisiario ti gundaway a makabirok ti regular a trabaho, makarugi ti negosio wenno makagun-od ti kanayonan a panagsanay kalpasan ti temporario a trabahoda.
