LAOAG CITY – Inbotos dagiti botante iti Quebec ti Parti Quebecois (PQ) iti kangrunaan a gundaway iti uneg ti sumurok maysa dekada a nangpangta ti ad-adda a nakaro a tension iti gobierno ni Prime Minister Mark Carney ken ti posible a referendum para iti indepence wenno pannakawaya-waya ti probinsia manipud iti Canada.
Ti mangidadaulo ti Parti Quebecois (PQ) a ni Paul St-Pierre Plamondon ti naikeddeng nga agbalin a baro a premier ti nadakamat a probinsia kalpasan a nangiyuna ti partidona iti napalabas nga eleksion.
Nagkari ni St-Pierre Plamondon a mangisayangkat ti maikatlo a referendum mainaig iti panagikkat wenno secession iti uneg ti uppat a tawen a terminona ngem inlawlawagna a mapasamak laeng daytoy inton bumaba iti puesto ni US President Donald Trump.
Kabayatan ti pangta ti panagsina ken ti panagngato ti risgo iti ekonomia ken pagpuonan, nakita dagiti survey a sumurok-kumurang 70% dagiti umili iti Quebec ti kontra latta iti independence iti tengnga ti agtultuloy a trade war iti Estados Unidos.
Karaman pay kadagiti kangrunaan a plano ti baro a premier iti umuna nga 100 nga aldawna iti puesto ti panagkissay kadagiti opisial ti gobierno, panagbaba ti buwis iti gasolina ken negosio ken panangipatungpal ti ad-adda a pinaiget a limitasion iti imigrasion.
Ti pakasaritaan a balligi ti partido ti separatists ket nangitunda ti panagbagsak ti popularidad ti agdama a mangidadaulo a Coalition Avenir Quebec gapu kadagiti napaay iti ekonomia ken pampubliko a serbisio.
