LAOAG CITY – Manamnama ti napintas ken maabot iti lebel ti produksion idi napalabas a tawen iti panagapit ti pagay ita nga Oktubre ken Nobiembre.
Daytoy ti inbatad ni Engr. Rosendo So, Chairman ti Samahang Industriya ng Agrikultura (SINAG).
Nupay nasayaat ti agdama nga apit, inlawlawag ni So a saan pay unay a marikna ti epekto ti nakaro a tikag gapu iti Super El Niño, a possible a tumama intono sumaruno a cropping season manipud Nobiembre agingga iti Marso iti sumaruno a tawen.
Gapu iti daytoy, binalakadan ti mangidadaulo ti Samahang Industriya ng Agrikultura (SINAG) dagiti mannalon nga awan umdas nga irigasyon nga agmula pay laeng dagiti high-value crops tapno makissayan ti possible a pannakalugi iti pagbiagan da.
Inpaganetgetna ti kinapateg ti nasapa a panangipaay ti fuel subsidy sakbay a mangrugi ti kabaroan a planting season tapno mausar nga insigida kadagiti kasapulan iti taltalon.
Kabayatanna, agtalinaed a tulbek ti nasapa a panagsagana ken naan-anay a suporta ti gobierno tapno mapagtalinaed a natibker ti produksion ti taraon iti baet ti pangta ti El Niño.
