Nagsagaba ti dua a sugat ti ulo ti maysa a lalaki kalpasan a tinagbat ti kinainuman na gapu iti maipagarop a nalabes nga angaw iti Barangay Bungon iti ciudad ti Batac.
Binigbig ni Police Capt. Junjun Medina, ti Chief of Police iti ciudad ti Batac, ti biktima a ni Eric Manglallan Gaoat, agtawen ti 48, naasawaan, electrician ken residente iti Barangay Billoca iti nasao a ciudad idinto a ti suspek ket ni Leonardo Bayangos y Belo, agtawen ti 71, awanan ti asawan ken residente iti Barangay Bungon ti nasao a ciudad.
Inbatad na nga iti imbestigasyon da, napasamak ti panagtagtagbat kabayatan ti panaginom da Bayangos ken Gaoat, kadwa da ti agnagan ti Felino Bayangos iti ruwar ti balay ti suspek.
Kuna ni Medina a ti rumrumuar a kinagura ti suspek ket iti panangiyangaw ti biktima a saan a nakaasawa daytoy gapu ta nakapuy nga agarem ti babai.
Inpetteng na a naibaga ni Bayangos a kababain no mangngeg dagiti karruba na ti ibagbaga ni Gaoat, ngem intultuloy latta daytoy ni biktima no sadinno a sinurot na pay ti suspek idi napan simrek iti kusina da.
Innayon ni Police Capt. Medina a mabalin a saanen a nalapdan ti suspek ti pungtot ken luksaw na isut gapuna nga innala na ti bunengna ken namintallo a daras a ginandat na a tagbaten ti ulo ti biktima.
Inpakaammo na a saan a nakaro ti sugat iti ulo a sinagaba ti biktima gaputa naisanggana ti ima na.
Naitaray a dagus ti biktima iti Mariano Marcos Memorial Hospital and Medical Center iti ciudad ti Batac babaen ti kadwa da metlaeng a naginom para iti naan-anay a pannakataming na.
Iti met panagresponde dagiti otoridad iti lugar, narekobre da ti buneng nga inusar ti suspek, ken iti panagsukimat da pay iti balay na ket ditoy a nakumpiskar da ti maysa a magnum revolver nga addaan ti maysa a bala para iti calibre 45 a paltog ken ti 27 a bala para iti calibre 22 a paltog.
Gapu iti daytoy, inbatad ni Police Capt. Medina a pinilaan da ti kaso a frustrated homicide ken ti panaglabsing ti Republic Act wenno Comprehensive Firearms and Ammunition Regulation Act ti nasao a suspek.
Iti agdama, nagtalinaed ti suspek iti Philippine National Police iti ciudad ti Batac.
