Binalakadan ni Engr. Shiela Opelac, ti mangidadaulo ti City Agriculture Office ditoy siudad ti Laoag dagiti mangngalap ti nasapa a panangilakoda kadagiti ikan kas panagsagana iti agbalin nga epekto ti Super El Niño.
Segun kenkuana, daytoy ket kas paset dagiti addang tapno maliklikan ti nakaro nga agbalin nga epekto ti Super El Niño.
Inbatadna a masapol a maliklikan ti ‘fish kill’ gapu ta no nabara ti panawen ket alisto nga agpatay dagiti ikan nga isu ti agbalin a dakkel a pukaw kadakuada no awan ti mapastrek da a puonan.
Mainaig iti daytoy, kunana nga iti agdama ket awan ti aniaman a nairekord da a nadadael a produkto ti agrikultura kas epekto ti El Niño.
Nupay kasta, agtultuloy ti panang-monitor da kadagiti amin a barangay ditoy siudad tapno maipaayan ti solusion no adda man ti agbalin nga epekto ti El Niño.
Kabayatanna,immunan a nangipaay ti fishery inputs ti City Agriculture Office ditoy siudad ken inkiddaw da kadagiti benepisiario a saan nga ilako dagitoy kalpasan ti maipagarop a sayangguseng nga adda dagiti barangay a mangilaklako kadagiti naawatda nga agri ken fishery inputs.
