Target ti Department of Justice (DOJ) a maipinal ken maipilan sakbay nga agngudo ti Nobyembre ita a tawen ti petition for extradition kontra ken ni Kingdom of Jesus Christ founder Pastor Apollo Quiboloy.
Inbatad ni Chief State Counsel Dennis Arvin Chan a dandanin malpas ti fact-checking, evaluation ken validation ti DOJ kadagiti dokumento nga insumitir ti Estados Unidos mainaig ti extradition request kontra ken ni Quiboloy.
Segun ken ni Chan, kasapulan a matingiting a naimbag ken i-cross-check dagiti nayun nga impormasyon a naipalaon iti request gapu ta dagiti baro a kaso a sangsangwen ni Quiboloy iti Estados Unidos ti agbalin a pagibasaran ti petisyon a maipila iti korte.
Nagkiddaw ti opisyal ti agingga iti agtapos ti Nobyembre tapno makaipaay ti DOJ ti nalawlawag nga update no nakasaganan daytoy nga agpila ti extradition petition.
Inlawlawag na a saan a mabalin a mangnamnama laeng ti DOJ kadagiti report wenno alegasyon, gapu ta kasapulan a siguradwen da a kompleto dagiti dokumento a mangsuporta iti kada akusasyon.
Innayon na a no nakurang dagiti ebidensya ket mabalin a mangpakapuy ti petisyon nga ipasango iti korte.
Naawat ti DOJ idi Agosto 7 ti formal extradition request ti US para ken ni Quiboloy ken dua pay a respondent.
Kinasoan ti Estados Unidos ni Quiboloy mainaig kadagiti alegasyon karaman ti sex trafficking ken dadduma pay a federal offenses, banag a naglikudan na amin dagiti alegasyon kontra kenkuana.
Ti panagpila ti petition for extradition ket saan a kaipapanan ti otomatiko a pannakaipatulod ni Quiboloy iti Estados Unidos gapu ta dumalan pay daytoy iti proseso ken panagdesisyon ti korte iti Pilipinas.
