Inbatad ni Barangay Kagawad Elviro Agoo iti Barangay Davila iti ili ti Pasuquin nga agturong danto iti Commission on Audit tapno amwen no ania ti kasayaatan nga aramiden da maipanggep iti ginatang ti barangay a kurung-kurong a maipagarop a substandard.
Inlawlawag ni Agoo a kalikagom da nga ibabawin ti ginatang da a kurung-kurong ken mangkita da laengen ti sabali a paggatangan da.
Nupay kasta, urayen da pay no ania ti ibalakad ti Commission on Audit, a no ituloy da lattan ngem masapol a kitaen da a nasayaat no ania ti kaibatugan ti budget da wenno ti kaibatugan ti binayadan da nga agarop 100 a ribo a pisos.
Immunan nga inrakurak ni Agoo ti maipagarop a pannakamanipular ti pondo a P200 a ribo a pisos para iti PBBM Bawat Barangay Makikinabang Program a naipaay iti barangay da.
Maipalagip a ti 100 ribo a pisos ket para iti scholarship program idinto a ti 100 a ribo a pisos ket maigtang para iti dadduma a kasapulan ti barangay da no sadinno a daytoy ti naigtang iti kurung-kurong.
Inpakaammo ni Agoo a naisubli dan iti supplier ti kurung-kurong tapno pabaliwan ken masurot dagiti kayatda nga specification na, ngem ti kayatda a maamoan iti Commission on Audit ket no mabalin da nga ibabawi lattan tapno mangkita da iti sabali a paggatangan da.
