Inlawlawag ni Professor Cielo Magno, maysa nga economist ken dati a Finance Undersecretary ti pagilian nga adda laeng ti dua nga aspeto no apay a bumabbaba ti balor ti piso kontra iti dolyar.
Inbatad na a ti umuna nga aspeto ket adda ti pakainaigan dagiti mapaaspasamak iti international context gapu ta pumigpigsa ti dolyar, nangato ti interest rate isut gapuna nga ad-ado met dagiti tattao a mangayat iti dolyar, ken ti agtultuloy a panagngato ti presyo ti langis a dakkel met a makaapektar iti sukat ti piso kontra ti dolyar.
Kuna na a ti maikadwa nga aspeto ket adda ti pakainaigan dagiti mapaspasamak iti bukod a pagilian, no sadinno a dagiti foreign investors ket kitkitaen da ti panangimanihir ti gobierno kas ti panaggastos, dumakdakkel nga utang, panag-budget ti gobierno, ania dagiti kangrunaan a prayoridad na ken ti isyu iti korapsyon.
Inpetteng ni Professor Magno a no makita dagiti gangannaet a negosyante ti saan a naurnus a panagresponde kadagiti isyu ti ekonomiya, dumakdakkel ti utang, ken dadduma pay a problema iti pagilian ket saan dan a kayat ti agpuunan iti peso no di ket kaykayat dan ti dolyar.
Mainaig iti daytoy, kuna ni Professor Magno nga adda ti positibo ken negatibo nga epekto ti panagbaba ti balor ti piso kontra iti dolyar.
Inlawlawag na a ti positibo nga epekto ti nangato a sukat ti dolyar ket pakabenepisyaran dagiti Overseas Filipino Workers gapu ta dakdakkel ti pakaisukatan ti ipatulod da para iti pamilya da ditoy Pilipinas.
Malaksid iti daytoy, dagiti maipatpatulod ken mailaklako a produkto manipod Pilipinas ket nalaklaka iti abroad gapu ta dolyar ti paggatang da no sadinno nga ad-ado met dagiti aggatang.
Innayon na nga iti met biang ti sektor ti turismo ket dakkel ti posibilidad na a dumur-as gapu iti manamnama a panagado dagiti gangannaet a turista nga umay bumisita ditoy Pilipinas agsipud da nalaklaka ti magastos da no dolyar ti usarenda.
Kabayatanna, inrakurak met ni Professor Magno a ti negatibo nga epekto na ti agtultuloy a panagbaba ti balor ti piso kontra iti dolyar ket ti panagbalin nga import dependent ti Pilipinas no sadinno a kaadoan kadagiti taraon nga papauneg ken us-usaren dagiti Pilipino ket imported no sadinno a nangin-ngina ti presyo dagitoy ken marikna ti makunkuna nga inflation.
Mainaig iti daytoy, nangipaay ti reaksyon ni Professor Magno iti nagbalin a rakurak ni Presidente nga awan ti rumbeng a pagdanagan iti panagbaba ti balor ti piso nga umabot iti P64 iti kada dolyar gapu ta gagangay laeng daytoy aglalo ket agtultuloy ti mapaspasamak a riribok iti middle east a mangitunda ti panagngato ti presyo dagiti produkto a petrolyo.
Inpaganetget na a gagangay laeng a daytoy ti agbalin a reaksyon wenno rakurak ti presidente tapno saan nga ad-adda a kumaro ti sitwasyon, ngem kasapolan a buyugan koma ti usto a desisyon ken solusyon ti problema.
