Inrakurak ni Provincial Fishery Officer Vanessa Dagdagan-Alimbuyuguen ti Ilocos Norte Bureau of Fisheries and Aquatic Resources (BFAR), nga agtultuloy ti pannakikoordinar da kadagiti Local Government Units (LGUs) iti probinsia mainaig iti produksion ken panangsalaknib kadagiti ikan a maala dagiti mangngalap, kas kadagiti ipon.
Segun kenkuana, ususarenda ti rekord ti produksion ti ipon idi napalabas a tawen tapno makita no adda met laeng ti nagngatoan ti produksion ita a tawen.
Innayonna a maysa kadagiti kangrunaan nga araramiden ti Ilocos Norte Bureau of Fisheries and Aquatic Resources (BFAR), ket ti panagkoordinar kadagiti nagdudua nga Local Government Units (LGUs) para iti conservation efforts ti industriya ti ipon.
Kunana nga adda dagiti ordinansa ti Provincial Government ken City Government mainaig iti panangprotehir kadagiti ipon ken ti lugar a pagbiaganda.
Segun iti nasao nga ordinansa, saan pay a mabalin ti panangala kadagiti ipon iti umuna ken maikadua nga aldaw ti pannakakita wenno panagparang dagitoy, tapno adda gundaway dagiti ipon a makapan kadagiti sabali a tributaries wenno sanga ti karayan iti uneg ti daga.
Iti daytoy a proseso, mabalin a dumakkel dagiti ipon agingga nga agbalin dagitoy a bukto wenno baleleng.
Kabayatanna, inlawlawag ni Alimbuyugen a maysa kadagiti inisiatiba ti Ilocos Norte Bureau of Fisheries and Aquatic Resources (BFAR), ket ti pannakitinnulong kadagiti Local Government Units (LGUs) tapno mapapigsa ti pannakaipatungpal ken pannakasurot kadagiti ordinansa a mangsalaknib iti industriya ti ipon.
Namnamaen ni Alimbuyugen a dumakkel ti bilang dagiti ipon iti sumarsaruno a bulan.
